श्यामची आई चित्रपटातील 'श्याम' हरपला....ज्येष्ठ अभिनेते, समीक्षक, प्राध्यापक माधव वझे यांचे दुःखद निधन

Santosh Sakpal May 07, 2025 04:33 PM

Mumbai: - श्यामची आई चित्रपटातील 'श्याम' हरपला....ज्येष्ठ अभिनेते, समीक्षक, प्राध्यापक माधव वझे यांचे आज सकाळी दुःखद निधन झालं आहे.

मुंबई: १९५३ साली प्रदर्शित झालेल्या श्यामची आई सिनेमात श्यामची भूमिका साकारणारे ज्येष्ठ अभिनेते अभिनेते माधव वझे यांचं नुकतच निधन झालं. वयाच्या ८६ व्या वर्षी त्यांनी अखेरचा श्वास घेतला.'श्यामची आई' या चित्रपटामुळं प्रकाशझोतात आलेले माधव वझे हे एक उत्तम नट होते. तसंच त्यांचा रंगभूमीचा अभ्याससुद्धा अतिशय दांडगा होता. अभिनयासोबत शिक्षण क्षेत्रातही ते कार्यरत होते. पुण्यातील वाडीया महाविद्यालयातून ते इंग्रजीचे प्राध्यापक म्हणून निवृत्त झाले होते.

माधव वझे यांचा जन्म २१ ऑक्टोबर १९३९ रोजी पुण्यात झाला. वाडिया काॅलेजातून इंग्रजीचे प्राध्यापक म्हणून ते निवृत्त झाले होते.अभिनेता, दिग्दर्शक, नाट्यगुरू आणि नाट्य समीक्षक अशी ओळख असलेल्या वझे यांना राज्य नाट्य स्पर्धेमध्ये उत्कृष्ट अभिनयासाठी रौप्यपदके मिळाली होती. भारतीय व पाश्चात्य प्रथितयश नाटककारांच्या नाटकांच्या प्रयोगाचे दिग्दर्शन त्यांनी केले होते. गोवा येथील कला अकादमीच्या नाट्य विभागामध्ये अभ्यागत प्राध्यापक म्हणून काम केलेले वझे आंतरराष्ट्रीय नाट्य समीक्षक संघाचे सभासद होते. नाट्य संघाच्या देश-परदेशातील अधिवेशनामध्ये त्यांनी शोधनिबंध सादर केले होते.

परशुराम देशपांडे यांनी मराठीत रूपांतरित केलेल्या शेक्सपियरच्या ‘हॅम्लेट’ या नाटकाचे दिग्दर्शन माधव वझे यांनी केले होते. नाटकात कनक दात्ये आणि नेहा महाजन यांनी प्रमुख भूमिका केल्या होत्या. हे नाटक २०१३ मध्ये रंगमंचावर आले होते.

माधव वझे यांची भूमिका असलेले चित्रपट

डिअर जिंदगी (हिंदी चित्रपट)

थ्री इडियट्स (हिंदी चित्रपट)

श्यामची आई (बालनट) माधव वझे यांची पुस्तके

प्रायोगिक रंगभूमी : तीन अंक (मूळ इंग्रजी ग्रंथाचे शांता गोखले यांनी केलेले संपादन; अनुवाद/संपादन – माधव वझे)

रंगमुद्रा (अनेक नाट्यकर्मींची व्यक्तिचित्रणे)

श्यामची आई, आचार्य अत्रे आणि मी (आठवणी)

नंदनवन (मुलांसाठी)

समांतर रंगभूमी : पल्याड- अल्याड

पुरस्कार

‘रंगमुद्रा’ या ग्रंथाला राज्य शासनाचा पुरस्कार

‘प्रायोगिक रंगभूमी : तीन अंक’ या ग्रंथाला राज्य शासनाचा पुरस्कार

‘श्यामची आई, आचार्य अत्रे आणि मी’ या पुस्तकाला पुणे महानगरपालिकेचा पुरस्कार

‘समांतर रंगभूमी : पल्याड- अल्याड’ या पुस्तकाला महाराष्ट्र साहित्य परिषद आणि पुणे नगर वाचन मंदिराचा पुरस्कार