Breaking: जुन्या मुंबई-पुणे महामार्गावर भीषण अपघात; खासगी बस दरीत कोसळून 8 जणांचा मृत्यू; 25 प्रवासी जखमी

Santosh sakpal April 15, 2023 07:51 AM

मुंबईच्या गोरेगावमधील एक झांज वादन पथक पुण्याहून कार्यक्रम करून परत येत असताना हा अपघात झाला

लोणावळा : जुन्या पुणे मुंबई महामार्गावर खाजगी बस दरीत पडून भीषण अपघात झाल्याची घटना समोर आली आहे. लोणावळ्याजवळ असलेल्या बोरघाटातील शिंगरोबा मंदिराजवळ पहाटे चार वाजताच्या सुमारास ही घटना घडली आहे. पुण्याहून मुंबईच्या दिशेने ही बस निघाली होती, यावेळी चालकाचा ताबा सुटल्याने अपघात झाल्याची प्राथमिक माहिती समोर आली आहे.

मुंबईच्या गोरेगावमधील बाजीप्रभू वादक गट (झांज पथक) हे पुण्याला एक कार्यक्रम करण्यासाठी गेले होते. पुण्याहून परत येत असताना त्यांच्या बसला जुन्या पुणे-मुंबई महामार्गावर अपघात झाला. शिंगरोबा मंदिराच्या अलिकडील घाटात ही बस बाजूच्या दरीत कोसळली. पहाट ४ च्या सुमारास हा अपघात झाल्याची प्राथमिक माहिती आहे. रायगडच्या खोपोली पोलीस ठाण्याच्या हद्दीत हा अपघात झाला.

दरम्यान, घटनास्थळी वेगाने मदतकार्य हाती घेण्यात आलं आहे. जखमींना खोपोली ग्रामीण रुग्णालयात पाठवण्यात येत आहे. मदतकार्यासाठी हायकर्स ग्रुप व आयआरबीचं पथकही हजर आहे. खाजगी रुग्णालयातील डॅाक्टर्सना मदतीसाठी पाचारण करण्यात आले आहे.