cabinet decision : मराठा, कुणबी विद्यार्थ्यांना परदेशी उच्च शिक्षणासाठी शिष्यवृत्ती मिळणार !

Santosh Gaikwad July 04, 2023 03:18 PM

मुंबई : अजित पवार यांनी रविवारी उपमुख्यमंत्री आणि राष्ट्रवादीच्या ८ आमदारांनी  मंत्रिपदाची शपथ घेतल्यानंतर आज शिंदे फडणवीस सरकारची पहिलीच कॅबिनेट बैठक पार पडली.

मुख्यमंत्री एकनाथ शिंदे यांच्या अध्यक्षतेखाली पार पडलेल्या राज्य मंत्रिमंडळाच्या बैठकीत  विविध निर्णय घेण्यात आले. यामध्ये मराठा, कुणबी विद्यार्थ्यांसाठी मोठा निर्णय घेण्यात आला आहे. मराठा, कुणबी विद्यार्थ्यांना परदेशी उच्च शिक्षणासाठी 'सयाजीराव गायकवाड - सारथी शिष्यवृत्ती' योजना जाहीर करण्यात आली आहे. या योजने अंतर्गत ७५ विद्यार्थ्यांना दरवर्षी शिष्यवृत्ती देण्यात येणार आहे. यामुळे महाराष्ट्रातील विद्यार्थ्यांना परदेशात शिक्षण घेण्याची संधी मिळणार आहे.

 *मंत्रिमंडळ बैठकीतील निर्णय (संक्षिप्त)*

* राज्याचे ग्रीन हायड्रोजन धोरण जाहीर. देशातील महाराष्ट्र हे पहिले राज्य. नवीकरणीय ऊर्जा प्रकल्पांना मोठे प्रोत्साहन ( ऊर्जा विभाग)

*  मराठा, कुणबी विद्यार्थ्यांना परदेशी उच्च शिक्षणासाठी सयाजीराव गायकवाड - सारथी शिष्यवृत्ती योजना. ७५ विद्यार्थ्यांना दरवर्षी शिष्यवृत्ती (नियोजन विभाग)

• दिंडोरी तालुक्यातील चिमणपाडा आणि त्र्यंबक तालुक्यातील कळमुस्ते येथील प्रवाही वळण योजनांना मान्यता  (जलसंपदा विभाग)

• नागपूर येथील मे.शिवराज फाईन आर्ट लिथो वर्क्सच्या कर्मचाऱ्यांना शासन सेवेत सामावून घेणार  (उद्योग विभाग)

• सेवानिवृत्त मुख्य न्यायमूर्ती, न्यायमूर्ती किंवा त्यांचे पती, पत्नी यांना सेवानिवृत्तीनंतरचे लाभ  (विधि व न्याय विभाग)

• सिंधुदुर्ग जिल्ह्यातील आंबोली, गेळे आणि चौकुळ येथील कबूलायतदार गावकर जमिनीबाबत निर्णय.(महसूल विभाग)

• नागपूर कृषि महाविद्यालय येथे  आंतरराष्ट्रीय कृषि सुविधा केंद्र  (कृषि विभाग)

• मत्स्यबीज उत्पादन आणि मत्स्यबीज संवर्धन केंद्रांचा भाडेपट्टी कालावधी वाढवून आता २५ वर्षे   (पदुम विभाग)