गेल्या तीन आठवड्यांपासून पावसाच्या प्रतीक्षेत उकाड्यानं नागरिक हैराण झाले होते. शुक्रवारी रात्रीच महाराष्ट्राच्या काही भागात मान्सूननं हजेरी लावली. आज सकाळपासून पुणे, मुंबईत पावसाच्या सरी बरसल्या आणि नागरिकांची उकाड्यापासून सुटका झाली. महाराष्ट्रातल्या बहुतांश भागात मान्सून सक्रीय झाला असून येत्या पाच दिवसांत मनसोक्त कोसळणार असल्याचा अंदाज वेधशाळेकडून वर्तवण्यात आला आहे.

के. एस. होसाळीकरांनी केलेल्या ट्वीटमध्ये महाराष्ट्राच्या बहुतांश भागात पुढच्या पाच दिवसांत मान्सून सक्रीय राहण्याचा अंदाज नमूद करण्यात आला आहे. यानुसार कोकण व विदर्भात काही दिवस मुसळधार ते अतीमुसळधार पाऊस कोसळण्याचा अंदाज वर्तवण्यात आला आहे. दुसरीकडे पश्चिम महाराष्ट्रात पुणे, सातारा आणि उत्तर महाराष्ट्रातील नाशिक जिल्ह्यातही मुसळधार ते अतीमुसळधार पावसाचा अंदाज नमूद करण्यात आला आहे. मराठवाड्यात पावसाचा जोर असेल, असंही वेधशाळेकडून सांगण्यात आलं आहे.

मुंबईत आज आणि उद्या अर्थात २४ आणि २५ जून रोजी मध्यम तीव्रतेचा तर २६ ते २८ जून या तीन दिवसांत मुसळधार पावसाचा अंदाज वर्तवण्यात आला आहे. ठाणे आणि पालघरमध्येही याच प्रमाणात पुढचे पाच दिवस पाऊस असेल.

https://twitter.com/Hosalikar_KS/status/1672528759654871040?ref_src=twsrc%5Etfw%7Ctwcamp%5Etweetembed%7Ctwterm%5E1672528759654871040%7Ctwgr%5E%7Ctwcon%5Es1_c10&ref_url=https%3A%2F%2Fwww.loksatta.com%2Fmaharashtra%2Fmaharashtra-monsoon-update-pune-mumbai-marathwada-heavy-rainfall-predicted-pmw-88-3744450%2F

रायगडमध्ये २५ जून ते २८ जून या कालावधीत मुसळधार ते अतीमुसळधार पावसाचा अंदाज आहे. रत्नागिरीत २४ ते २६ जून या तीन दिवसांत मुसळधार ते अतीमुसळधार पाऊस, तर २८ व २८ जून रोजी मुसळधार पाऊस कोसळण्याची शक्यता आहे. सिंधुदुर्गात २४ जून रोजी मुसळधार ते अतीमुसळधार तर २५ ते २७ जून या तीन दिवसांत मुसळधार पावसाची शक्यता आहे.