नवी दिल्ली : देशात एनडीए सरकार स्थानापन्न होत असून  नरेंद्र मोदी हे तिस-यांदा पंतप्रधान पदाची शपथविधी घेणार आहेत. रविवार ९ जून रोजी सांयकाळी ७ वाजता राष्ट्रपती भवन येथे  शपथविधी सोहळा होणार आहे. दुसरीकडे संसदेचा विरोधी पक्षनेता कोण होणार याची उत्सुकता लागली असतानाच, काँग्रेस कार्यकारिणी समितीच्या बैठकीत राहुल गांधींना विरोधी पक्षनेतेपद स्वीकारण्याची मागणी काँग्रेसच्या वरिष्ठ नेत्यांनी केली आहे.  त्यामुळे, संसदेतील विरोधी पक्षनेतेपदी राहुल गांधींचीच निवड होणार हे जवळपास निश्चित समजलं जात आहे. 

काँग्रेस कार्यकारणी समितीच्या बैठकीमध्ये अनेक सदस्यांनी राहुल गांधी यांनी विरोधी पक्ष नेतेपद घ्यावं, यासाठी विनंती केली आहे. काँग्रेस अध्यक्ष मल्लिकार्जुन खर्गे यांनी देखील राहुल गांधी यांना पक्ष सदस्यांच्या भावना मान्य करावे लागतील, असे म्हटले आहे. तर, काँग्रेस कार्यकारिणीच्या बैठकीत संसदेतील विरोधीपक्षनेतेपदासाठी राहुल गांधींच्याच नावावर एकमताने शिक्कामोर्तब झाल्याचं काँग्रेस नेते के.सी. वेणुगोपाल राव यांनीही सांगितलं आहे. तर, काँग्रेस पक्षाचे गटनेते म्हणून राहुल गांधींनी निवड झाल्याचंही जाहीर करण्यात आली आहे. त्यामुळे, राहुल गांधींच विरोधी पक्षनेतेपदाच्या खुर्चीवर बसू शकतात हे जवळपास निश्चित झालं आहे.

 
राहुल गांधी धाडसी आणि साहसी नेते आहेत, ते डोळ्यात डोळे घालून बोलू शकतात. ते महत्त्वाच्या मुद्द्यांची माहिती ठेवतात. त्यामुळे, त्यांनाच संसदेतील विरोधी पक्षनेतेपदी जबाबदारी देण्यात यावी, अशी काँग्रेस कार्यकारणीच्या समितीच्या पदाधिकाऱ्यांची मागणी आहे, असे खासदार प्रमोद तिवारी यांनी म्हटलं आहे.

दरम्यान, लोकसभा निवडणूक निकालात भाजपप्रणित एनडीए आघाडीला  २९४ आणि इंडिया आघाडीला २३२ जागांवर विजय मिळाला आहे. त्यामुळे, बहुमताच्या जोरावर एनडीएन आघाडीने पंतप्रधान नरेंद्र मोदींची गटनेतेपदी निवड केली आहे. घटकपक्षांनीही मोदींच्या नावावर एकमत केल्यामुळे आता ९ जून रोजी पंतप्रधान नरेंद्र मोदी तिसऱ्यांदा पंतप्रधानपदाची शपथ घेणार आहेत. तर, राहुल गांधींचीही विरोधी पक्षनेता म्हणून लवकरच अधिकृच घोषणा होऊ शकते. 

़़़़़