कोतवालांचे मानधन साडेसात हजाराहून आता १५ हजार मिळणार !

Santosh Gaikwad April 06, 2023 07:52 PM

मुंबई, दि. ६ : राज्यातील कोतवालांच्या मानधनवाढीला वित्त विभागाची मान्यता मिळाली असून कोतवालांच्या मानधनात दुप्पटीने वाढ करण्यात आली आहे. त्यामुळे कोतवालांना  ७ हजार ५०० वरून १५ हजार रूपये मानधन मिळणार आहे. राज्याचे महसूल मंत्री राधाकृष्ण विखे- पाटील यांनी ही माहिती दिली आहे.  त्यामुळे राज्यातील सर्व १२,७९३ कोतवालांना याचा लाभ मिळणार आहे. 

राज्यातील कोतवालांच्या मानधनवाढीबाबत   उपमुख्यमंत्री तथा वित्तमंत्री देवेंद्र फडणवीस यांनी ९ मार्च २०२३ रोजी राज्याचा सन २०२३-२४ अर्थसंकल्प सादर करतांना अर्थसंकल्पीय भाषणाच्यावेळी केलेल्या घोषणेप्रमाणे राज्यातील कोतवालांच्या मानधनवाढीच्या सादर केलेल्या प्रस्तावास मा. मंत्रिमंडळाच्या बैठकीत मान्यता दिलेली आहे. त्यानुसार सध्या सेवा कालावधीनुसार कोतवालांना मिळत असलेले मानधन ७ हजार ५०० रुपयावरून १५ हजार करण्यात येणार आहे. राज्यातील सर्व १२,७९३ कोतवालांना यापुढे दरमहा सरसकट १५ हजार इतके मानधन लागू करण्यात आले आहे. १५ हजार रुपये इतके मानधन दि. ०१ एप्रिल २०२३ पासून अनुज्ञेय असणार आहे.