१२८ धावांच्या धावसंख्येचा पाठलाग करताना दिल्लीची सुरुवात खास झाली नाही. कर्णधार मेग लॅनिंगने १३ चेंडूत ३ धावा केल्या. ती बाद झाल्यानंतर शफाली वर्मा आणि जेस जोनासेन यांनी डावाची धुरा सांभाळली. दोघांनी मिळून ७४ धावांची भागीदारी केली. शेफाली वर्माने २७ चेंडूत ५ चौकार आणि ३ षटकारांसह ४४ धावांची खेळी केली. शेफाली वर्माने मेग लॅनिंगच्या विकेटनंतर संघाचा डाव सावरला तर जोनासनबरोबर उत्कृष्ट भागीदारी रचली.

महिला प्रीमियर लीग सामन्यात दिल्ली कॅपिटल्सने शानदार गोलंदाजी करत गुजरात जायंट्सला २० षटकांत ९ गडी गमावून १२८ धावांवर रोखले. नाणेफेक जिंकल्यानंतर दिल्ली कॅपिटल्सची कर्णधार मेग लॅनिंगने प्रथम गोलंदाजी करण्याचा निर्णय घेतला. संघातील वेगवान गोलंदाजी आक्रमणाने हा निर्णय अगदी योग्य असल्याचे सिद्ध केले.

गुजरातकडून डिएंड्रा डोटिनने २६ धावा, तनुजा कन्वरने १६ धावा तर भारती फुलमाली हिने ४० धावांची खेळी केली. याशिवाय संघाचे सर्व खेळाडू स्वस्तात बाद झाले. दिल्लीकडून शिखा पांडेने २ विकेट्स, मारिजन कापने २ विकेट्स, एनाबेल सदरलँडने २ विकेट्स घेतले. तर तितास साधू आणि जोनासनने प्रत्येकी १ विकेट घेतली.